Sipas disa lajmeve në medie, Kosova nuk mund të llogaritë më në 50 milionë eurot e fondit investiv të Qeverisë amerikane “MCC”, të cilat ishin të parapara për investime në Kosovë, por gjithashtu as në 150 milionë eurot tjera të gazit që planifikoheshin të investoheshin poashtu në vendin tonë, shkruan GazetaBlic.
Siç u tha në medie, goditja amerikane erdhi pasi që Qeveria e Kosovës po refuzon ta heqë tarifën ndaj mallrave serbe.
Por për të gjitha këto lajme, qeveria e Kosovës nuk ka informacion.
Zëvendëskryeministri i Kosovës, Haki Abazi, tha për GazetaBlic, se aktualisht MCC-ja ka ndarë 10 milion euro për Kosovën, deri sa tha se Qeveria nuk është e informuar nëse është suspenduar nga ndonjë projekt që ka qëllim investimin në Kosovë.
“Nuk kemi informacion e as shuma 200 milionëshe nuk është çka është përkushtimi, po smuj me komentu tituj të gazetave që e kanë për qëllim presionin, është folë për 200 milion, janë 10 milion që janë të përkushtume për Kosovë, ne nuk kemi informacion në kuptimin e dhurimit të suspendimit dhe përkrahjes prej MMC-së”, tha Abazi për GazetaBlic.
Kujtojmë se vetëm pak ditë më parë, kryetari i Lidhjes Demokratike të Kosovës, Isa Mustafa, ka thënë se ka biseduar në telefon me ambasadorin Richard Grenell, ku ky i fundit e ka paralajmëruar për sanksionet rreth fondeve të MCC.
“Sot më ka kontaktuar Grenell në telefon, më ka paralajmëruar për sanksionet rreth fondeve të MCC”, është shprehur Mustafa.
Për prishjen e raporteve me miqtë amerikan, ka folur edhe zëvendëskryeministri i Kosovës, Avdullah Hoti.
Ai ditë më parë ka thënë se LDK-ja nuk rrinë në një qeveri e cila izolon dhe prish raportet me Shetet e Bashkuara të Amerikës.
