Së shpejti fillon viti i ri shkollor, e Policia e Kosovës ka disa këshilla për sigurinë gjatë rrugëtimit për në Shkollë.
Derisa është thënë se prioritet është siguria e këmbësorëve, përmes një njoftimi në Facebook, Policia ka bërë të ditur se si të përdoret vendkalimi për këmbësorë, si të vetëdijesohen drejtuesit e mjeteve.
Njoftimi i plotë i Policisë së Kosovës:
Fillimi i vitit shkollor – Prioritet siguria e këmbësorëve
-Si ta përdorim vendkalimin për këmbësorë
Mësoni fëmijët si të përdorin vendkalimin e shënuar në mënyrë të sigurt dhe të shikojnë nga të dy anët para se të kalojnë rrugën.
-Vetëdijesimi i drejtuesve të mjeteve
Drejtuesit e automjeteve duhet të jenë më të vëmendshëm afër shkollave dhe vendkalimeve për këmbësorë, veçanërisht gjatë orëve të ardhjes dhe largimit nga shkolla.
-Jepni shembull të mirë
Tregoni sjellje të sigurta në rrugë për fëmijët tuaj – mos kaloni jashtë vijave të bardha dhe gjithmonë ndalni për të parë trafikun.
-Siguria në mjetin transportues shkollor
Sigurohuni që fëmijët të kuptojnë rregullat e hyrje dhe daljes nga mjetet transportuese si dhe sjelljet e sigurta përreth tij.
-Shmangni shpërqendrimet
Shmangni përdorimin e telefonit apo pajisjeve të tjera gjatë ecjes – sytë dhe vëmendja duhet të jenë në rrugë.
