Feronikeli ka nisur të hulumtojë për pasuesin e Dejan Vukiqeviç, pas rezultateve negative dhe formës luhatëse të ekipit.
Dy humbjet e njëpasnjëshme dhe dyshimet e trajnerit malazez për bojkot të lojtarëve ndaj tij, kanë bërë që kryesia e klubit të mendojë trajnerin e ri.
Gazeta Olle mëson përmes burimeve pranë klubit nga Drenasi se Nikli ka kontaktuar Bylbyl Sokolin.
Palët kanë nisur bisedimet, por marrëveshja deri më tani nuk është arritur.
“Olle” ka kontaktuar edhe Sokolin, i cili deklaroi që për hir të korrektësisë nuk mund të komentojë pasi që Vukiçeviq është ende në postin e trajnerit.
Pas humbjes nga Drenica, trajneri i Feronikelit shpërtheu ndaj lojtarëve për angazhimin.
“Pas ndeshjes do të takohem me kryesinë e klubit sepse gjërat nuk po shkojnë siç i kemi planifikuar. Nëse unë jam problemi, atëherë është shumë lehtë ta zgjidhim”, deklaroi malazezi dje për “Supersport”.
“Futbollistët nuk po e japin maksimumin dhe kjo u pa edhe sot. Ata nuk po e respektojnë fanellën dhe kryetarin e klubit, i cili po investon shumë”.
“Unë i mbroj gjithmonë lojtarët edhe nëse luajnë dobët, por jo kur nuk angazhohen”.
“Po të kisha mundësi do t’i bëja 8 zëvendësime sot”, shtoi ai.
Feronikeli pas dy humbjeve radhazi ka mbetur prapa në luftën për titull.
