Pas anëtarësimit të Kosovës në UEFA dhe në FIFA zyrtarë të lartë të këtyre organizatave kishin ardhur në Prishtinë dhe ishin të qartë në kërkesën e tyre, duke i bërë thirrje politikës kosovare t’i mbajë duart larg futbollit pasi përzierja e politikës me futboll është e ndaluar rreptësishtë, shkruan sot gazeta “Zëri”.
Pas kësaj, kishin ardhur dy dorëheqje të politikanëve nga Federata e Futbollit të Kosovës, por largimi i politikës nga futbolli mbetet shumë i largët në krahasim me prezencën apo afrimin e saj në futboll.
“Ne nuk mund ta paragjykojmë qëllimin e Ramiz Lladrovcit nëse dorëheqja, të cilën e ka kërkuar për kryetarin e Feronikelit, ka qëllim politik apo në interes të futbollit. Sidoqoftë, ne jemi anëtarë të UEFA-s dhe të FIFA-s, të cilat i ndalojnë përzierjet e politikës me futboll dhe do të ishte mirë që këto rregulla të respektohen edhe në vendin tonë”, ka deklaruar FFK-ja për “Zërin”, e cila thekson se është ithtare për t’i parë klubet të pavarësuara nga komunat, duke iu nënshtruar procesit të shndërrimit të statuseve të tyre nga ato publike në private apo në shoqëri aksionare. /Zëri/
