Me Gjykatën Speciale nuk po pajtohen ata që humbën familjen. Imer e Bashkim Deliu, nga Abria e Drenasit, të cilëve iu masakruan 16 anëtarë të familjes, kërkojnë që të gjenden dhe të dalin para drejtësisë ata që ua vranë familjarët e tyre gjatë luftës në Kosovë.
Krejt çka ka mbetur, janë varret e fëmijëve, pleqve e grave që u masakruan nga forcat militare e paramilitare serbe.
Imer Deliu e Bashkim Deliu, të cilëve iu masakruan 16 anëtarë të familjes, po kërkojnë mirëkuptim nga SHBA-të që Gjykatën Speciale ta shfuqizojnë, dhe të bëhet një gjykatë që do t`i hetojë krimet serbe që kanë ndodhur në Kosovë 20 vjet më parë e që deri tash nuk është akuzuar askush.
Edhe Bashkim Deliu, që humbi babain, vëllanë me bashkëshorten dhe dy fëmijët, kërkon drejtësi. Ai thotë se Ushtria Çlirimtare e Kosovës, mbrojti popullin e paarmatosur, ndaj të cilëve u kryen dhunime, vrasje, masakrime e gjenocid.
Që nga viti i kaluar këta familjarë të viktimave kishin dërguar një kërkesë në Kuvendin e Kosovës, duke kërkuar nga deputetët që ta ngritin zërin për t`u hetuar kryerësit e këtyre krimeve si në Abri, Rezallë, Izbicë, Krushë, Mejë e vende tjera.
Autor: Besart Galica
