Gjiganti metalurgjik, “Ferronikeli” pritet të ndërroj pronarë. Burime të sigurta të Indeksonline bëjnë të ditur se në ditët e fundit ka patur negociata të vazhdueshme për shitjen e kompanisë së madhe kosovare që ndodhet në Drenas.
“Ka negociata të vazhdueshme, ka përafrime por ende s’është zyrtarizuar shitja. Gjatë kësaj jave pritet të ketë përsëri takim mes pronarëve aktual dhe blerësve potencial dhe ka gjasa të mëdha që kompania të shitet” ka thënë një burim i Indeksonline, brenda gjigantit metalurgjik.
“Ferronikeli” është pronë e miliarderit shqiptar, Samir Mane, dhe kompanisë së tij “Group Balfin”.
“Grup Balfin” kishte nënshkruar marrëveshje me “NKL Limited” për të zotëruar 90 përqind të aksioneve të Neëco Ferronikel katër vite më parë.
Megjithatë kompania asnjëherë nuk ka gjetur rehatinë financiare dhe të prodhimit duke u përballur me probleme të vazhdueshme.
Punëtorët e Ferronikeli pak javë më parë kanë dalur në protestë duke kërkuar kthimin e prodhimit dhe një pjesë e tyre edhe kthimin në punë.
Që nga fundi i vitit të kaluar, Ferronikeli pothuajse ka ndërprerë tërësisht prodhimin duke bërë që ndërmarrja të futet në krizë të thellë financiare./Indeksonline/