Edhe një futbollist i talentuar po rritet në Vushtrri (foto)
Vushtrria vazhdon të prodhojë talentë për Evropë, dhe pas Milot Rashicës, i radhës me të cilin do të krenohet kjo Komunë, është Ermir Rashica.
Për koinçidencë, edhe talenti 12-vjeçar vjen nga familja Rashica, duke qenë kusherinj i yllit të Vitesses dhe Përfaqësueses së Kosovës.
Ermiri, me tipare të sulmuesit është pjesë e Shkollës së Futbollit “El Clasico” në Vushtrri, që drejtohet nga vëllezërit Besart e Faton Cecelia dhe drejtori Hajrush Dushi.
Talentin e tij e zbuloi vetë Besart Cecelia në emisionin Arena në Tribuna Channel. “Është pasardhësi i Milotit. Ndoshta do të bëhet edhe më i mirë se ai”, theksoi Cecelia.
Këto deklarata vetëm sa e kanë motivuar Ermirin, të vazhdojë rritjen e tij në sportin më të popullarizuar në botë.
“Karakteristikat e mija prej futbollisti janë shënimi i golave dhe shpejtësia, si dhe driblingu një me një. Këto tipare më veqojnë nga të tjerët”, thotë Rashica për Gazetën Olle.
Lexo edhe23 vjeçari në Drenas vrau veten, në familjen e tij 12 anëtarëshe nuk punon askush (Foto)
Të ndjesh aq shumë golin nuk ka se si të mos e kesh idhull njeriun e golave. “Idhulli im është Cristiano Ronaldo, derisa nga shqiptarët, Xherdan Shaqiri”.
Ai ka edhe një ëndërr, të ndjek rrugën e të afërmit të tij, Milotit, i cili nga Vushtrria u transferua në Vitesse të Holandës, derisa e ardhmja e tij shihet të jetë në njërën nga top-pesë ligat më të forta në Evropë.
“Normalisht që ëndërroj të bëhem si Miloti dhe ëndrrën ta kthej në realitet”, shton sulmuesi vushtrrias.
Edhe pse vetëm 12 vjet, atij nuk i mungojnë çmimet e shumta të fituara si individualisht, ashtu edhe me grupmoshat e reja të “El Clasicos”. Në turneun në Turqi, u shpall lojtari më i mirë, derisa çmimin e njëjtë e fitoi edhe në turneun ‘Pavarësia’ në Shqipëri, të mbajtur muajin e kaluar.
Për të gjitha këto ai ka një falënderim, për çka nuk harron të falënderojë drejtorin e shkollës, Hajrush Dushi, dhe trajnerët Besart e Faton Cecelia, të cilët më kanë dhënë mundësinë dhe kujdesin. /Olle
