Dy foshnje të lindur para kohe, me peshë më pak se një kilogram, vdiqën javën e kaluar në spitalin San Maurizio në Bolzano të Italisë, pasi u prekën nga një infeksion serioz.
Autoritetet shëndetësore besojnë se infeksioni që shkarkoi vdekjen e tyre erdhi nga një detergjent për larjen e enëve i përdorur nga spitali, i cili u tërhoq menjëherë nga tregu.
Sipas New York Post, foshnjat lindën përkatësisht në javën e 23-të dhe 27-të të shtatzënisë dhe u infektuan me bakteret Serratia marcescens, një mikrob që mund të jetë fatal për njerëzit me sistem imunitar veçanërisht të prekshëm. Dy të porsalindurit vdiqën më 12 dhe 13 gusht nga sepsa e shkaktuar nga infeksioni.
Mikroorganizmi është i lidhur, sipas drejtorit mjekësor të Autoritetit Shëndetësor të Tirolit Jugor, Josef Widmann, me detergjentin industrial të përdorur nga spitali.
“Prania e këtij bakteri nuk është unike, pasi përbën një rrezik të vazhdueshëm për njësitë e kujdesit intensiv për të porsalindurit, jo aq shumë për shkak të llojit të mikrobit, por për shkak të cenueshmërisë së veçantë të këtyre pacientëve të vegjël, për shkak të sistemit të tyre imunitar të papjekur”, tha drejtori i spitalit, Pierpaolo Bertoli.
Siç konfirmoi Widmann, të gjitha detergjentet e larjes së enëve të përdorura në mjediset shëndetësore të Bolzanos u tërhoqën menjëherë. Në të njëjtën kohë, drejtoresha mjekësore, Dr. Monika Zaebisch, njoftoi se, deri në njoftim të mëtejshëm, spitali nuk do të pranonte më të porsalindur të parakohshëm me rrezik të lartë për shtrimin në spital.
Zyra e Prokurorit të Bolzanos po shqyrton urdhërimin e autopsisë së dy foshnjave për të përcaktuar nëse vdekjet e tyre ishin të lidhura me lëshime ose neglizhencë, gjë që mund të çojë në ndjekje penale. Sakaq, të gjithë detergjentët për larjen e enëve të përdorur në mjediset shëndetësore të Bolzanos u tërhoqën menjëherë nga tregu.
