Dwayne Johnson hap një kapitull të ri në muzikë, kënga e parë ua kushtohet vajzave të tij

Dwayne Johnson po mendon ta bëjë muzikën një pjesë më të rëndësishme të karrierës së tij, ndërsa zhanri country duket se është drejtimi që aktori dhe ish-ylli i WWE dëshiron ta eksplorojë më seriozisht.

Ylli i Hollivudit ka publikuar së fundmi këngën “Your Dad”, të cilën e ka shkruar së bashku me ish-fituesin e “American Idol”, Iam Tongi.

Në një intervistë për “Rolling Stone”, Johnson tregoi se muzika ka qenë gjithmonë një pjesë e rëndësishme e jetës së tij dhe se tani po mendon ta zhvillojë më tej këtë pasion.

“Po e eksploroj këtë mundësi. Muzika ka qenë gjithmonë një mbështetje për mua, veçanërisht zhanret që dua, si muzika tradicionale country”, tha ai.

Një këngë personale për vajzat e tij

Johnson theksoi se projekti i fundit muzikor ka një domethënie krejtësisht personale, pasi kënga u është dedikuar vajzave të tij.

Sipas tij, muzika i jep një ndjesi lirie që nuk e përjeton gjithmonë në projektet e mëdha filmike.

“Kjo këngë për mua është thjesht diçka që ua kam kushtuar vajzave të mia. Nuk ka presion për të menduar për shitjet, fitimet apo numrin e dëgjimeve. Është thjesht diçka nga unë për to”, u shpreh Johnson.