Të dashur qytetarë,
Ju e dini ku është adresa e PDK-së së vërtetë. Kuptueshëm që është tek ne, meqë shumica e Kryesisë së Degës nuk pranuan që në këto zgjedhje të jetë kandidat njeriu që për 5 vite e stagnoi zhvillimin e komunës sonë, refuzoi ta zbatojë programin “Dekada e Re” dhe refuzoi t’i pëmbush zotimet që i kishim dhënë si PDK.
Prandaj, kryetari në ikje, nuk e ka përfaqësuar dhe as nuk e përfaqëson sot emrin e PDK-së. Ju e patë se si ai dhe njerëzit rreth tij iu gëzuan moscertifikimit edhe të kandidatëve nga radhët e PDK-së. Kjo tregon shumë.
Kryetari në ikje është në panik dhe jemi të vetëdijshëm se do të përdor çdo mjet në institucione, për ta evituar humbjen që e pret.
Por, secilit vendim të KQZ-së për të mos na certifikuar me emërtimin ligjor Dekada e Re, do t’i përgjigjemi me ankesë, deri në instancën e fundit.
Megjithëkëtë, kryetari në ikje duhet ta dijë një gjë: Emrin tim nuk mund ta ndërrojë e ndryshojë. As të bashkëpunëtorëve të mi.
Siç jemi zotuar, ne do të jemi në garë. Ne jemi të vendosur t’i çlirojmë qytetarët e Drenasit nga pushteti zullumqar, tek i cili nuk shihni asnjë vlerë të PDK-së.
