Drejtori sportiv i Istras shihet në “Fadil Vokrri” bashkë me Eros Grezdën – çfarë po përgatitet?

Sasa Bjelanovic, drejtori sportiv i klubit kroat Istra, është parë sot në stadiumin “Fadil Vokrri” në Prishtinë gjatë duelit Kosovë U21 – Qipro U21. Prania e tij nuk ka kaluar pa u vënë re, veçanërisht pasi ai është shfaqur në shoqërinë e menaxherit të njohur kosovar Eros Grezda.

Takimi mes dy figurave të futbollit ka nxitur menjëherë spekulimet për një lëvizje të mundshme në merkato, ndërsa mbetet për t’u parë nëse vizita e Bjelanovicit në Prishtinë lidhet me ndonjë futbollist kosovar apo me ndonjë bashkëpunim të ri.

Bjelanovic nuk është një emër i panjohur në futbollin europian. Para se të kalonte në rolin drejtues, ai ka pasur karrierë si futbollist, duke luajtur ndër të tjera për skuadra të njohura italiane si Torino dhe Atalanta.

Pas karrierës në fushën e blertë, ai iu përkushtua punës menaxheriale dhe skautimit. Bjelanovic ka mbajtur postin e drejtorit sportiv te Hajduk Spliti, ndërsa ka punuar edhe si skaut te Atalanta.