Senatorja demokrate, Jeanne Shaheen, ka bërë thirrje për rivendosjen e sanksioneve ndaj ish-presidentit nacionalist të Republikës Srpska, Milorad Dodik.
Ajo tha se Administrata Trump duhet të ndihet e turpëruar nga vendimi i saj për ta hequr liderin e Republikës Srpska, Milorad Dodik, nga sanksionet amerikane në tetorin e kaluar.
“Z. Dodik ka përdorur retorikë separatiste dhe ka minuar integritetin e Marrëveshjes së Paqes së Dejtonit, gjë që bie ndesh drejtpërdrejt me arsyetimin e administratës për ta hequr Dodikun dhe bashkëpunëtorët e tij nga lista e sanksioneve në fund të vitit të kaluar”, ka thënë ajo.
Dodik aktualisht po qëndron në SHBA ku kanë shkuar edhe figura të tjera politike për Lutjet e Mëngjesit. Dodik dje njoftoi për një takim me zëdhënësen për media të presidentit amerikan, Donald Trump, Karoline Leavitt.
Qëndrimin e tij në SHBA e ka kritikuar Shaheen.
“Vizita e z. Dodik në Uashington e ka bërë plotësisht të qartë se ai nuk është i interesuar t’i vërë interesat e të gjithë qytetarëve të Bosnjës përpara interesave të tij politike. Administrata Trump duhet të veprojë me shpejtësi për të rivendosur sanksionet ndaj z. Dodik, në përputhje me sanksionet e detyrueshme që unë sigurova në Aktin më të fundit të Autorizimit të Mbrojtjes Kombëtare”, ka shkruar ajo./Express/
