Agron Sejdiu ka fituar pozitën e Sekretarit Koperativ në ndërmarrjen NPL Stacioni i Autobusëve në Prishtinë.
Sipas burimeve të IndeksOnline Sejdiu është djali i axhës së ish-deputetit të Partisë Socialdemokrate, Dardan Sejdiut.
IndeksOnline po ashtu ka siguruar dokumentin në bazë të cilit është përzgjedhur për këtë pozitë nga bordi i drejtorëve në ndërmarrjen Stacioni i Autobusëve.
Ai ka fituar konkursin me 38 pikë.
Në dokument thuhet se Sejdiu i ka kaluar me sukses të dy fazat e intervistimit të kandidatëve.
Kundërshtar për pozitën Sekretar Koperativ Sejdiu kishte Erza Tullumi, e cila kishte marrë 35 pikë në intervista.
“ Rrjedhimisht z.Agron Sejdiu shpallet fitues i konkursit të rishpallur për Sekretar Koperativ të NPL Stacioni i Autobusëve sh.a Prishtinë, i shpallur fillimisht më 25.09.2019, intervistat për të cilin post u mbajtën në hapësirat e ndërrmarrjes”, thuhet në dokument.
Ndryshe, Dardan Sejdiu ishte nënkryetar i Lëvizjes Vetëvendosje deri në momentin kur u nda kjo parti dhe ai kaloi në Partinë Socialdemokrate.
Me besim të plotë anëtarët e kësaj partie patën hyrë në garë në zgjedhjet e 6 tetorit 2019 por PSD pësoi debakël.
Tashmë, udhëheqësit e këtij subjekti politik duket se po kujdesen që t’i emërojnë njerëzit e afërt në ndërmarrjet të cilat menaxhohen nga Komuna e Prishtinës, në krye me ish- kryetarin e PSD-së, Shpend Ahmetin.
Dardan Sejdiu më 2016 ishte i dyti në Komunën e Prishtinës, pra nënkryetar./IndeksOnline/
