Koronavirusi ka prekur edhe Fakultetin e Mjekësisë të Universitetit të Prishtinës. Disa profesorë në këtë fakultet kanë rezultuar pozitivë për COVID-19. Informacione rreth gjendjes së tyre ka dhënë Prodekani për Çështje Akademike, Safedin Muçaj.
Në një përgjigje për Express, Muçaj ka thënë se disa prej profesorëve të këtij fakulteti janë të infektuar me koronavirus, por se po qëndrojnë në vet-izolim në shtëpitë e tyre.
Sipas tij, të gjithë janë duke respektuar te gjitha rekomandimet e parapara nga Instituti Kombëtar i Shëndetit Publik.
Ai ka treguar se në Klinikën Infektive gjenden të hospitalizuar edhe dy profesorë të pensionuar si në arsim dhe shëndetësi.
“Disa profesorë tjerë në FM fillimisht kanë qenë pozitiv në COVID 19, por qe në ndërkohë janë shëruar dhe kanë rezultuar me testim negativ -COVID 19. Disa të tjerë si staf akademik i FM janë infektuar me COVID 19 dhe janë duke qëndruar në vet-izolim në shtëpitë e tyre. Të gjithë janë duke respektuar te gjitha rekomandimet e parapara nga IKSHPK”, thuhet në përgjigjet e Muçajt drejtuar Gazetës Express.
Ndryshe, dje në Laboratorin e Mikrobiologjisë Molekulare në IKSHPK, janë testuar gjithsej 324 mostra të marra nga Klinika Infektive dhe gjurmimi i kontakteve të rasteve në terren, prej të cilëve rezultojnë 152 raste pozitive.
Rastet pozitive janë nga Prishtina, Prizreni, Fushë Kosova, Vushtrria, Mitrovica, Gjilani, Drenasi, Gjakova, Skenderaj, Kacaniku, Lipjani, Obiliqi, Peja, Rahoveci, Kamenica, Malisheva, Suhareka, Vitia, Ferizaj, Graçanica, Klina, Mamusha, Shtimja dhe Zubin Potoku.
Nga konfirmimi i rasteve të para më 13 mars e deri sot, janë konfirmuar 3 mijë e 508 raste me këtë sëmundje, me gjithsej 75 raste të vdekjes të cilët kanë pasur sëmundje të tjera shoqëruese./Gazeta Express
