Rruga drejt ujësjellësit lokal në fshatin Viniçe është sanuar, uji është klorinuar dhe pastruar për pije, është informuar kryeministri Emil Dimitriev gjatë vizitës së sotme të këtij vendbanimi i cili ishte përfshirë nga përmbytjet, transmeton Telegrafi Maqedoni.
Qytetarët e Viniçes kanë shprehur kënaqësi për sanimin edhe të rrugës së dëmtuar dhe kanë kërkuar që ekipet në terren të dalin dhe të bëjnë vlerësim se si të sanohet vendi në të cilin rrjedhat e ujit kanë bërë kanale të cilat në të ardhmen do të ndalnin vërshimet e ngjashme.
Gjatë vizitës së sotme në Smilkovcë, kryeministri Dimitriev ka informuar banorët se është pranuar kërkesa e tyre për formimin e ekipeve të ekspertëve bujqësor për kontrollin e cilësisë së truallit.
“Ekipet janë formuar dhe do të fillojnë të punojnë për të treguar nëse trualli është me cilësi të çrregulluar, nëse është në gjendje të mirë dhe nëse mund të vazhdohet me mbjelljen e kulturave bujqësore’, ka thënë Dimitriev.
