Deputetja e VV’së, Donika Kadaj-Bujupi akuzoi presidentin e Kosovës se është kryekriminel, duke thënë se edhe qëndrimi i LDK’së karshi ngjarjeve është i turpshëm.
Por ish-deputetja e AAK’së, që dikur e mbronte me fanatizëm, po thotë se partia e Ramush Haradinajt ka marrëveshje të fshehtë me PDK’në, ndaj edhe qëndron e heshtur pas zhvillimeve të fundit dhe publikimit të përgjimeve të Adem Grabovcit.
“Në vend që të distancohet nga ky koalicion po dëgjojmë deklarata të Mustafës që Thaçi qenka president i shkëlqyeshëm. Është e dhimbshme që anëtarësia e LDK’së votoi kundër ‘Pronto’ e në fund u mashtruan nga Isa Mustafa. Nuk kemi dëgjuar që as AAK të reagojë a të kritikojë në lidhje me këto skandale. Ky është konfirmim i një marrëveshje të fshehtë. Kjo është pasqyruar edhe më herët. Sot kur të gjithë do duhej të ishim bashkë kundër krimit, LDK e AAK po vazhdon të qëndrojë e heshtur”, deklaroi Kadaj-Bujupi në konferencën për media të thirrur në selinë e VV’së.
Sipas saj, për LDK është momenti i fundit ta prishë koalicionin dhe AAK të heq dorë nga marrëveshjet me këta kriminelë.
Në këtë konferencë u bë e ditur se shumë shpejtë VV’ja do të thërrasë edhe protestë.
