Dafina Zeqiri nuk i harron lehtë ngjarjet dhe këtë e ka vërtetuar sërish ditën e sotme, duke rikthyer në vëmendje një nga debatet më të diskutuara të këtij edicioni të Big Brother VIP Albania. Ndonëse Stenaldo Mëhilli është eliminuar prej javësh nga shtëpia dhe përplasja mes tij dhe Rogert Sterkajt i përket një kapitulli të mbyllur të lojës, për këngëtaren kjo temë mbetet ende shqetësuese.
Gjatë ditës së sotme, Dafina ka ndarë me miliona ndjekësit e saj në Instagram një postim nga llogaria zyrtare e Stenaldos, ku theksohet mbrojtja e të drejtave të personave me aftësi të ndryshme dhe apelohet fuqishëm për ndalimin e bullizmit.
Pjesa që ka tërhequr më së shumti vëmendje është shënimi bashkangjitur postimit në Instastory, ku këngëtarja nuk është kursyer aspak me fjalët drejtuar Rogertit. Ajo e ka cilësuar atë si “mashkullin” më të urryer shqiptar, duke përdorur thonjëzat për të theksuar zhgënjimin e saj mbi veprimet e tij. Krahas kësaj, ironia e saj ka vijuar me përdorimin e një emoji ofendues në emrin e tij, duke shprehur kështu hapur indinjatën për akuzat e rënda që Rogerti i bëri Stenaldos kohë më parë rreth shikimit dhe akuzave për viktimizim.
Zeqiri njihet si një personazh publik që mban qëndrime për kauza të ndryshme sociale dhe rikthimi i kësaj teme sot provon se ajo vazhdon të dënojë ashpër çdo lloj forme të bullizmit, pavarësisht se sa kohë ka kaluar nga ngjarja.
