Udhëtimi ajror po bëhet luks, çmimet rriten me 57% në Zvicër
Çmimet e biletave ajrore në Zvicër kanë shënuar një rritje të ndjeshme prej 57 për qind gjatë pesë viteve të fundit, sipas një analize të përbashkët të platformës së konsumatorëve Comparis dhe Institutit Ekonomik KOF, përcjell albinfo.ch.
Sipas ekspertëve, nuk pritet ndonjë ulje e qëndrueshme e çmimeve në të ardhmen e afërt. Michael Kuhn, ekspert i udhëtimeve në Comparis, thekson se biletat ajrore nuk ka gjasa të bien ndjeshëm apo në mënyrë afatgjatë.
Ai shton se, edhe pse mund të ketë një ulje të lehtë të çmimeve në muajt në vijim, në përgjithësi ato do të mbeten dukshëm më të larta se nivelet para pandemisë.
Rritja e kostove të fluturimeve po ndikon drejtpërdrejt te udhëtarët dhe industria e turizmit, duke e bërë udhëtimin ajror gjithnjë e më të shtrenjtë për konsumatorët. /Albinfo.ch
