Një rast i pazakontë ka befasuar policinë në SHBA, ku një pronar amerikan përdori inteligjencën artificiale për të zbuluar vendndodhjen e makinës së tij të vjedhur – një Lamborghini Huracan EVO.
Andrew Garcia nga Orange County kishte humbur makinën luksoze dy vite më parë, si pjesë e një mashtrimi shumë-milionësh ku dhjetëra automjete me qira nuk u kthyen kurrë. Ndryshe nga të tjerët që arritën të rimerrnin pronat e tyre, Garcia mbeti pa gjurmë nga “Lambo”-ja e tij.
Për një kohë të gjatë, çështja dukej e mbyllur – deri kur Garcia mori një mesazh të papritur në Instagram. Në të ishin bashkëngjitur disa fotografi të makinës dhe një pyetje enigmatike: “E shite këtë makinë?”.
Kjo ngjalli dyshimet e tij, ndaj vendosi të përdorë ChatGPT dhe disa mjete të Google për të analizuar imazhet. Me ndihmën e AI-së, ai arriti të lokalizojë vendndodhjen e mundshme të makinës – Denver, Colorado.
Pasi kontaktoi autoritetet, policia verifikoi se bëhej fjalë pikërisht për makinën e vjedhur. Zyrtarët e Colorado Auto Theft Prevention Authority e përshkruan ndërhyrjen e Garcia-s si një shembull të inteligjencës proaktive që ndihmon në luftën kundër krimit.
Ndërkohë, hetimet për rrjetin e gjerë të vjedhjeve të makinave luksoze në Kaliforni vazhdojnë. Disa nga të përfshirët tashmë janë dënuar, ndërsa të tjerë janë në pritje të gjykimit.
