Komuna e Drenasit ia ka dërguar Donatorit të BE-së, vendimin për lokacionin, Ministria e Arsimit ka rekomanduar Kryetarin Lladrovci, në shkresën e datës 10.06.2017, se caktimi i lokacionit në fshatin Tërstenik “është larg zonës urbane” andaj BE-ja kishte kërkuar që objekti për fëmijët të ndërtohet në zonën urbane.
Komuna e Drenasit, ndjen për obligim të sqaroj opinionin rreth ndërtimit të çerdhes së qytetit, temë kjo e ngritur kohën e fundit nga disa kandidat për kryetar komune, duke e dezinformuar qytetarin për poenë politik.Komuna e Drenasit, assesi nuk ka qëllim politik me këtë komunikatë. Qëllimi kryesor i saj është të njoftohen qytetarët e Komunës dhe opinioni rreth procedurave për ndërtimin e saj, pasi që me ndërtimin e kësaj çerdhe është interesi i qytetarëve.
Komuna fillimisht kishte nisur kërkesat në Ministrinë e Arsimit, mirëpo në bashkëpunim me këtë të fundit dhe Komunën e Drenasit ishte gjetur donatori për ndërtimin e çerdhes nga Bashkimi Evropian dhe ishte kërkuar që Komuna të merr vendimin për fillimin e procedurave për ndërtimin e objektit.
Në kuadër të kësaj, kryetari i Komunës, Ramiz Lladrovci ne mbledhjen e Kuvendit të Komunës në muajit shkurt të këtij viti, kishte dërguar katër propozime për ndërtimin e çerdhes dhe Kuvendi kishte vendosur që çerdhja të ndërtohet në Tërstenik.
Pasi që Donatorit të BE-së, i është dërguar vendimi, Ministria e Arsimit ka rekomanduar Kryetarin Lladrovci, në shkresën e datës 10.06.2017, se caktimi i lokacionit në fshatin Tërstenik “është larg zonës urbane”, andaj BE-ja kishte kërkuar që objekti për fëmijët të ndërtohet në zonën urbane dhe kishte kërkuar afatin optimal që të dërgohen dokumentacionet e një sipërfaqe prej 30 ari për ndërtimin e saj.
Kryetari i Komunës së Drenasit kishte propozuar lokacionin për ndërtimin e objektit të ri të çerdhes për fëmijët në vendin e quajtur “Ashanajka”.
Për hir të korrektësisë dhe transparencës ndaj opinionit, me këtë komunikatë sqarojmë se kushdo që shpreh interesim për të verifikuar këto fakte, për ndërtimin e çerdhes, do t’ia japim, në disponim, sipas kërkesës zyrtare.
