Ambasada e Britanisë së Madhe në Kosovë ka shkruar në lidhje me vendimin e presidentes Vjosa Osmani për të tërhequr kërkesën për interpretim kushtetues lidhur me seancën konstituive të Kuvendit.
Kjo ambasadë përmes një postimi në Facebook, ka bërë thirrje që Gjykata Kushtetuese të respektohet dhe të promovohet nga të gjitha palët, shkruan lajmi.net.
“Gjykata Kushtetuese e Kosovës ka procedura të përcaktuara mirë për shqyrtimet dhe vendimet e saj. Aftësia e Gjykatës për të funksionuar në mënyrë të pavarur është jetike për demokracinë e Kosovës. Kjo duhet të respektohet dhe promovohet nga të gjitha palët, dhe vendimet e Gjykatës të respektohen dhe zbatohen”, ka shkruar ambasada e Britanisë së Madhe në Facebook
Në një konferencë për media më 5 gusht, Osmani deklaroi se arsyeja e tërheqjes ishte emërimi i gjyqtarit serb Radomir Llaban si raportues në këtë çështje.
Sipas presidentes, institucionet e sigurisë e kishin cilësuar Llabanin si person të rrezikshëm për rendin kushtetues dhe sigurinë kombëtare në raportet e viteve 2018, 2021 dhe 2024. /Lajmi.net/
