Brian Hickerson flet pasi u përjashtua nga ceremonia e Hayden Panettiere
Brian Hickerson, i dashuri i të ndjerës Hayden Panettiere, “e kupton” përse nuk është përfshirë në listën e të ftuarve në ceremoninë e përkujtimit të aktores, e cila do të zhvillohet këtë të shtunë, një muaj pas vdekjes së saj.
Sipas TMZ, Brian dhe vëllai i tij, Zach, i cili gjithashtu nuk është ftuar në ceremoni, nuk po e kundërshtojnë vendimin e organizatorëve.
Burime pranë tyre thanë për median se vëllezërit e kuptojnë ndjeshmërinë që rrethon ceremoninë dhe respektojnë vendimin për të mos i përfshirë në listën e të ftuarve.
Pavarësisht mungesës së tyre, Brian, 37 vjeç, dhe Zach, 38 vjeç, shpresojnë që ceremonia të jetë një “festë e bukur” në nder të Panettiere, jetës dhe trashëgimisë së saj.
Burimet thanë gjithashtu se të dy vazhdojnë të përpiqen të përballojnë vdekjen e aktores, ndërsa Brian thuhet se po e ka veçanërisht të vështirë të përshtatet me jetën pa të.
Sipas të njëjtave burime, Brian ka humbur rreth 18 kilogramë që prej vdekjes së Panettiere dhe po përpiqet të rifitojë një “ndjesi normaliteti” në jetën e tij.
Ai thuhet se ende ka momente kur pret të marrë një telefonatë nga Hayden dhe mendon se e gjithë situata mund të rezultojë të jetë thjesht një “makth i tmerrshëm”.
Brian dhe Zach kanë vijuar gjithashtu të mohojnë çdo përfshirje në vdekjen e aktores.
Lexo edheTrixa “ndez” Instagramin me foton e fundit, por vëmendjen e mori ky detaj
Familjarë, miq të afërt dhe ish-kolegë të Panettiere pritet të mblidhen këtë të shtunë në një kishë në Malibu, Kaliforni, për ceremoninë private të përkujtimit. Rreth 150 persona pritet të marrin pjesë.
Hayden Panettiere vdiq në moshën 36-vjeçare më 16 gusht në Greenville, South Carolina, konfirmoi familja e saj.
Sipas raportimeve, aktorja u gjet pa ndjenja nga Zach, ndërsa Brian ishte duke fjetur në një dhomë tjetër.
Page Six publikoi më herët edhe audion e telefonatës në numrin e emergjencës 911, ku u përmend mundësia e një mbidoze.
Një raport i fundit pretendoi se Panettiere kishte marrë një tabletë oksikodoni të përzier me fentanil mëngjesin e vdekjes së saj. Përfaqësuesi i aktores, megjithatë, e cilësoi këtë pretendim si “thashetheme të pakonfirmuara” dhe tha se vdekja e saj “mbetet nën hetim”.
Ndërkohë, Brian u prangos nga policia më 12 shtator pas një incidenti të dyshuar në një lokal në Greenville. Gjatë incidentit, ai u dëgjua duke thënë: “GPD e nxori informacionin kur vdiq e dashura ime.”
