Përkundër masave të qeverisë për mbylljen e bizneseve dhe qendrave tregtare, pas konfirmimit të rasteve pozitive me Coronavirus, disa nga dyqanet në komunën e Ferizajit nuk po e respektojnë këtë vendim, shkruan Gazeta Insajderi.
Nga disa fotografi që kanë dërguar lexuesit e Insajderi, shihet që bizneset në këtë komunë po e vazhdojnë edhe sot veprimtarin e tyre.
Ndryshe, Qeveria e Kosovës pas konfirmimit të dy rasteve pozitive me Coronavirus, ka ndërmarrë këto masa:
1. Ndalohen hyrje daljet e qytetarëve në Komunën e Klinës;
2. Ndalohen hyrje daljet e qytetarëve në Komunën e Vitisë;
3. Ndërpritet me efekt të menjëhershëm transporti ndër-urban në Republikën e Kosovës, si dhe transporti i organizuar ndërkombëtar;
4. Mbyllen kufijtë tokësor për udhëtarët që hyjnë në Kosovë, kjo nuk vlen për qytetarët kosovarë, të gjithë shtetasit e Kosovës të cilët hyjnë përmes këtyre kufijve do t’iu nënshtrohen kontrolleve të shtuara mjekësore me urdhrin që ata të vet izolohen për 14 ditë;
5. Nga data 16 mars 2020 ora 24:00, bëhet pezullimi i përkohshëm i të gjitha linjave të udhëtimit ajror në Aeroportin e Prishtinës, përveç fluturimeve ushtarake, dhe emergjencave medicinale (MEDIVAC). Përjashtim bëjnë linjat e udhëtimit në ardhje me ekuipazh, por pa udhëtarë që shërbejnë vetëm për largim të udhëtarëve nga Kosova;
6. Mbyllen kafeteritë, baret, pabet dhe restorantet, qendrat tregtare me përjashtim të farmacive dhe marketeve ushqimore;
7. Pezullohen të gjitha aktivitetet kulturore dhe sportive;
8. Mbyllen tregjet e kafshëve dhe tregjet e automjeteve;
9. Reduktohen në veprimet esenciale dhe staf esencial çdo institucion publik, përveç stafit të sektorit të shëndetësisë dhe të sektorit të sigurisë;
10. Urdhërohen kompanitë private që ta organizojnë punën në atë mënyrë që shumicën e aktiviteteve punëtorët t’i kryejnë nga shtëpia.
