Ministri i Financave dhe Transfereve, Besnik Bislimi, në një intervistë për Ekonomia Online tha se kryeministri Albin Kurti nuk i nënshtrohet asnjë afati kohor të askujt.
Bislimi, duke komentuar kërkesën e kreut të LDK-së, Isa Mustafa që kryeministri, Kurti ta heq taksën dhe ta anulojë vendimin për shkarkimin e ish-ministrit Agim Veliu, shtoi se Veliu nuk do të mund të kthehet në asnjë rast.
Sipas tij, plani i kryeministrit ka qenë largimi i taksës fillimisht për lëndën e parë, pastaj zëvendësimi me reciprocitet.Kur do të ndodh kjo Bislimi thotë se i mbetet Kurtit të vendos.
“Një person që ka qenë në vazhdimësi kundër koalicionit, minimumi i sinqeritetit ka qenë me than nuk do të behëm pjesë e qeverisë. Edhe këtu s’ka me pas kthim mbrapa, është e palogjikshme me pas kthim mbrapa, një individ të tillë me kthyer. Ka LDK-ja mjaftueshëm individ të tjerë që munden me kryer këtë punë me nder. Nuk po them më mirë se më mirë funksionin ministria edhe pa ministër fare se që ka funksionuar me ministrin Agim Veliu”.
“Kryeministri Kurti nuk i nënshtrohet kurrfarë afati kohor të askujt. Kryeministri Kurti që në start e ka bërë të qartë planin e vet. Plani i kryeministrit ka qenë largimi i taksës tarifës, fillimisht për lëndën e parë,pastaj zëvendësimi me reciprocitet, kur të hiqet tarifa e plotë. Edhe kështu do të veprohet. Kur do të bëhet kjo vendos kryeministri Kurti”.
“Kryetari Mustafa në marrëveshjet e koalicionit e ka pasur të qartë se ka veç një Qeveri, Qeveri Kurti, ka një kryeministër, kryeministri Kurti, është kryeministri i të gjithëve, përfshirë edhe ministrat e LDK-së dhe rrjedhimisht askush nuk veto në shkarkimin e ministrave. Ajo që ka thënë Isa Mustafa nuk është e saktë, Isa Mustafa e ka ditur që në start që për shkarkim të ministrave koordinohen me partnerin. Mirëpo, nuk merret aprovim”.
Mustafa ka thënë se e pret edhe sot Kurtin ta heqë taksën dhe ta anulojë vendimin për Veliun, për t’i dhënë mundësi të vazhdojnë partneritetin tutje edhe në kohën kur Kosova po lufton me pandeminë Coronavirus.
Mustafa përmes një postimi në rrjeti social Facebook, ka treguar se i është drejtuar Kurtit me një letër më 16 mars duke i shprehu shqetësimin se mosheqja e tarifës dhe ashpërsimi i marrëdhënieve me ShBA-në do ta sjellë në pikëpyetje koalicionin.
Ai më tej ka thënë se përkundër përpjekjeve nga Kurti ka marrë si përgjigje shkarkimin e Agim Veliut, duke e quajtur si vendim tradhtar në kundërshtim me Marrëveshjen për koalicion.Kurti ka shkarkuar Agim Veliun nga pozita e ministrit të punëve të Brendshme dhe Administratës, veprim ky i tij që ka bërë që LDK-ja të paralajmërojë mocion mosbesimi për Qeverinë.
