Pas disa tentativave të pasuksesshme për ta konstituuar Kuvendin e Kosovës, nesër pritet të mbahet seanca e radhës, ku në fokus do të jetë zgjedhja e kryetarit të kuvendit. Ende nuk është e qartë nëse do të ketë zhvillime të reja që mund të çojnë drejt zgjidhjes së ngërçit politik.
Deputetja e Lidhjes Demokratike të Kosovës (LDK), Hykmete Bajrami tha se gjithçka varet nga Lëvizja Vetëvendosje dhe vullneti i saj për të propozuar një kandidat që mund të sigurojë shumicën e nevojshme parlamentare.
“Zgjedhja e kryetarit të kuvendit varet nga gatishmëria e Lëvizjes Vetëvendosje për të propozuar një kandidat që mund të sigurojë 61 vota,” tha Bajrami për IndeksOnline.
Bajrami shtoi se aktgjykimi i Gjykatës Kushtetuese ka qartësuar se mënyra si ishte tentuar votimi i mëhershëm përmes votimit të fshehtë dhe me ndërprerje të seancës ka qenë në kundërshtim me Kushtetutën.
“Gjykata ka vendosur kufizime strikte: votimi për kryetarin duhet të jetë i hapur dhe i kufizuar deri në tri herë për të njëjtin kandidat. Ju rikujtoj se Albulena Haxhiu në votim të hapur ka dështuar gjashtë herë. Edhe kundërshtimi i 48 herë i komisionit për votim të fshehtë nga deputetët ka qenë në fakt votë kundër saj”, theksoi ajo.
Ajo ka qenë e qartë në qëndrimin e saj se, nëse Lëvizja Vetëvendosje e propozon sërish Albulena Haxhiun, atëherë është e dukshme se nuk ka vullnet për zgjidhje.
“Nëse nesër propozohet prapë zonja Haxhiu, atëherë shihet qartë se LVV-ja nuk ka reflektuar, nuk ka interesim e as interes për të konstituuar kuvendin. Do të vazhdohet me bllokadë,” përfundoi Bajrami.
Tani mbetet të shihet nëse seanca e nesërme do të sjellë ndonjë kthesë në procesin e konstituimit të kuvendit apo do të përballemi me një tjetër raund të bllokadës institucionale./IndeksOnline/
