Ish-zëvendësministri Bajram Gecaj ka deklaruar përkrahjen e tij për kandidaturën e Ruzhdi Shehut për kryetar të Komunës së Junikut, duke e cilësuar atë si një vizionar që i ka dhënë jetë një komune që për vite kishte mbetur në hije.
Në një postim publik, Gecaj ka kujtuar kohën kur, katër vite më parë, së bashku me shumë të tjerë, i besuan Shehut për të sjellë një frymë të re në Junik. Ai thekson se në mandatin e parë, Shehu nuk doli vetëm një kryetar i mirë, por një udhëheqës që solli zhvillim të prekshëm për komunën.
Gecaj përmend projektet e realizuara gjatë mandatit të Shehut, duke veçuar faktin se me një buxhet vjetor prej gjysmë milioni eurosh për investime kapitale, u siguruan projekte mbi 10 milionë euro dhe një investim madhor në një park solar prej 42 milionë eurosh.
Sipas tij, përtej shifrave dhe projekteve, Shehu është dalluar për qeverisje me integritet, transparencë dhe respekt ndaj qytetarëve, ndërsa ka ruajtur lidhjen e ngushtë me njerëzit e Junikut.
Ai e cilëson Shehun si ekonomist dhe ndërmarrës vizionar, me përvojë të gjatë në institucionet e Kosovës, i cili e njeh nga afër funksionimin e tyre dhe nevojat për ndryshim.
Në postim, Gecaj ka përmendur edhe zotimin publik të Shehut se mandati i dytë do të jetë i fundit për të si kryetar, duke e konsideruar këtë dëshmi të sinqeritetit dhe faktin se pushteti për të nuk është qëllim, por mjet për t’i shërbyer qytetarëve.
Po ashtu, ai ka përshëndetur angazhimin e Shehut për diasporën, duke theksuar se rreth 1,300 junikas të mërgatës janë regjistruar për të votuar në zgjedhjet e 12 tetorit.
“Unë nuk kam asnjë dyshim: Juniku këtë herë nuk ka nevojë për balotazh. Kryetari i ardhshëm do të jetë i njëjti që e ringriti dhe e bëri me shpresë – Ruzhdi Shehu. Vota për Ruzhdën është votë edhe për mua!”, ka shkruar Gecaj, duke ftuar qytetarët të votojnë Lidhjen Demokratike të Kosovës dhe kandidatin e saj për kryetar.
