Ministria e Shëndetësisë ka vendosur t’i hyjë aventurës së implementimit të Ligjit për sigurime shëndetësore duke e shkelur këtë ligj. Ky institucion nga muaji korrik po planifikon të fillojë mbledhjen e premiumeve nga qytetarët, por ende nuk dihet se kur qytetarët do të përfitojnë nga këto sigurime.
Ministria e Shëndetësisë nuk ka finalizuar asnjë veprim që do ta bënte të zbatueshëm këtë ligj, por nga fillimi i muajit të ardhshëm të gjithë të punësuarit në sektorin publik do të ndajnë 3.5 për qind të pagës për të marrë “shërbime më cilësore” shëndetësore, shkruan sot “Koha Ditore”.
Ligji i cili po konsiderohet si baza e reformës së shëndetësisë e nisur para shumë kohësh rrezikon t’i kthehet Kosovës në bumerang nëse institucionet nuk tregohen të kujdesshme. Vonesat në krijimin e kushteve për fillimin e implementimit të këtij ligji mund ta thellojnë krizën në shëndetësi. Ata që pritet të përfitojnë nga zbatimi i ligjit pa krijimin e kushteve janë sektori privat.
Ngutja për të filluar zbatimin e ligjit nuk e ka ngutur shtetin që të investojë në spitalet publike. Në mungesë kushtesh, aparaturash e hapësirash ky sektor jo vetëm që nuk është i gatshëm të mbijetojë, por madje rrezikon që t’i falimentojnë shumë shërbime. Por edhe spitalet publike janë treguar “zemërgjerë” me spitalet private.
