Agjencia e Ushqimit dhe Veterinarisë (AUV) ka njoftuar opinionin publik për tërheqjen nga tregu të produkteve APTAMIL 1 PRONUTRA 800 gr. ADVANC dhe APTAMIL PRE PROFUTURA DUO ADVA 800 gr, pas konstatimit të pranisë së substancës Cereulide në formulën e ushqimit për fëmijë.
Sipas AUV-së, njoftimi është pranuar nga Republika e Shqipërisë, përkatësisht nga Autoriteti Kombëtar i Ushqimit, i cili është informuar përmes Sistemit të Paralajmërimit të Shpejtë për Ushqimin dhe Ushqimin për Kafshë (RASFF), me numër reference 2026.0663. Produktet kanë origjinë nga Gjermania, shkruan IndeksOnline.
Autoritetet shqiptare kanë njoftuar se subjekti “Rossmann & LALA SH.P.K.” në Shqipëri ka eksportuar produktin APTAMIL 1 PRONUTRA 800 gr. ADVANC, lot 172911, me datë skadimi 10.11.2026, në Republikën e Kosovës për kompaninë Rossmann Kosova.
Po ashtu, pas inspektimit të depos së kompanisë Rossmann Kosova, inspektorët kanë konstatuar se kompania ka nisur tërheqjen edhe të produktit APTAMIL PRE PROFUTURA DUO ADVA 800 gr, me numër artikulli 405663100.
AUV ka bërë të ditur se, në bashkëpunim me kompaninë përkatëse, është duke u realizuar grumbullimi dhe bllokimi i këtyre produkteve dhe se së shpejti do të fillojë procesi i asgjësimit të tyre, në përputhje me legjislacionin në fuqi.
Agjencia u bën thirrje qytetarëve që të mos i përdorin këto produkte dhe t’i kthejnë ato në pikat e shitjes./IndeksOnline/
