Austria i thotë “JO” SHBA-së për Iranin, Europa ndan qëndrimet ndaj luftës
Austria ka refuzuar kërkesën e Shtetet e Bashkuara të Amerikës për përdorimin e hapësirës ajrore në kuadër të operacioneve ushtarake kundër Iranit, duke u mbështetur në ligjin e saj për neutralitetin.
Ministria e Mbrojtjes në Austri konfirmoi se nga Uashingtoni kanë ardhur disa kërkesa, por pa dhënë detaje për numrin e tyre. Sipas transmetuesit publik ORF, zyrtarët theksuan se çdo kërkesë do të shqyrtohet rast pas rasti, në koordinim me Ministrinë e Jashtme.
Austria, e njohur për politikën e saj të hershme të neutralitetit ushtarak, nuk ka vendosur një ndalim të përgjithshëm për fluturimet amerikane, por po mban një qëndrim të kujdesshëm ndaj përfshirjes në konflikt.
Lexo edheIrani: Ngushtica e Hormuzit e hapur vetëm për anijet që nuk kanë lidhje me SHBA
Ndërkohë, qëndrimet në Europë duken të përçara. Spanja, një nga kundërshtarët më të fortë të luftës, ka deklaruar se hapësira e saj ajrore është e mbyllur për avionët ushtarakë amerikanë të përfshirë në konflikt.
Edhe Italia ka refuzuar javën e kaluar përdorimin e një baze ushtarake në Siçili për bombarduesit amerikanë, duke sinjalizuar një rezervë në rritje në disa vende europiane ndaj operacioneve ushtarake kundër Iranit.
