I dyshuari për vrasjen e dyfishtë në fshatin Gollubovc të Malishevës, Astrit Isufi nga Sankoci i Drenasit, ndodhet i shtrirë në Qendrën Klinike Universitare të Kosovës (QKUK) dhe po ruhet nën masa të rrepta sigurie.
Emergjenca e QKUK-së është mbushur me pjesëtarë të Policisë së Kosovës, të cilët po kujdesen për sigurinë e të dyshuarit gjatë trajtimit mjekësor, transmeton IndeksOnline.
Sipas burimeve brenda QKUK-së, gjendja e tij shëndetësore është e qëndrueshme, ndonëse ai ka disa plagë nga arma e zjarrit.
Policia ka konfirmuar se pas arrestimit në orët e hershme të mëngjesit në fshatin Plloqicë të Malishevës, Isufi është transportuar fillimisht në urgjencën e Malishevës, e më pas në QKUK për trajtim të mëtejshëm.
Në komunikatën zyrtare të Policisë së Kosovës thuhet se në vendin e krimit, në Gollubovc, janë gjetur dhe sekuestruar dy armë zjarri, çka ngre dyshime se në momentin e vrasjes ka pasur të shtëna nga të dyja palët.
Hetimet për zbardhjen e plotë të ngjarjes po vazhdojnë në koordinim të plotë me Prokurorinë e Shtetit.
Ngjarja e rëndë ndodhi më 6 nëntor, kur dy vëllezërit Naim dhe Driton Morina mbetën të vrarë, ndërsa i dyshuari ndodhej në arrati deri në arrestimin e sotëm./IndeksOnline/
