Rroga që po shpërndahen për disa këshilltarë që po paguhen nga ‘arka e shtetit’, po shihet si çështje brengosëse nga deputetët e Lidhjes Demokratike të Kosovës.
Driton Selmanaj e ka quajtur të panevojshëm dhe jo të arsyeshme pagën që po ia jep shteti i Kosovës Arbana Xharrës, këshilltares së kryetarit të Kuvendit, Kadri Veseli.
“Ka 5 muaj që vazhdon të merr pagë dhe nuk është në Kosovë. Pra, të ardhurat mujore ku përshihet paga bazë, shujta … nxjerr përfundimisht se asnjëri se ka pagën nën 1800. Pse të abuzohet me paranë publike në Kosovë”, ka thënë ai.
Ndryshe, këshilltarja e kryeparlamentarit, Xharra merr rrogë mujore 1512 euro në muaj, më shumë se Kryeministri i shtetit, Ramush Haradinaj, i cili ka rrogën 1347 euro.
Gjatë seancës, Selmanaj ka shtuar pyetjen se si është e mundur që Veseli të ketë 15 këshilltarë, ndërsa ish-kryetarët tjerë t’i kenë nga 2, 4 ose 7 këshilltarë.
Deputeti i LDK-së po ashtu ka kërkuar të bëhen publike emrat e këshilltarëve.
