Aq shumë i ka bërë përshtypje një traktor i vjetër prodhim gjerman i viteve të 50-ta, sa shefi i diplomacisë gjermane në Prishtinë, ambasadori Christian Heldt, ka ndaluar sot eskortën e tij dhe ka shikuar me pasion dhe nostalgji traktorin gjerman në oborrin e shtëpisë së Sherif Bunjakut në fshatin Studime të epërme të Vushtrrisë.
Duke i ngjallur kujtime nga fëmijëria, ngase gjyshi i tij kishte punuar pikërisht në atë fabrikë traktorësh dhe ai vet ka jetuar në atë rajon, ambasadori gjerman ka thënë se ky traktor i vjetër, tregon simbolikisht raportet e shkëlqyera mes Gjermanisë dhe Kosovës, raporton Gazeta Online Veriu.info.
Pas vizitës tek fermerët e Rajonit të Vushtrrisë që në dy vitet e fundit kanë përfituar nga ndihma gjermane, dhe pas takimit me drejtuesit e organizatës Iniciativa për Zhvillimin e Bujqësisë së Kosovës –IADK, ambasadori Heldt, ka thënë se është ndarë i kënaqur nga puna e fermerëve. “Është një punë e shkëlqyer që IADK dhe GIZ po bëjnë në zonat rurale ku njerëzit jetojnë dhe duhet të krijojnë perspektivë për jetën e tyre, ne do të vazhdojmë ti mbështesim ata edhe në të ardhmen”, ka deklaruar ambasadori gjerman për Gazetën Veriu.info.
Vet IADK-në, ambasadori gjerman e ka vlerësuar organizatë shumë profesionale e cila punën e saj nuk e bazon vetëm tek donacionet për fermerë, por edhe vizitat e vazhdueshme në terren, që të siguroj një zhvillim të qëndrueshëm të tyre.
Ndërsa Zenel Bunjaku, drejtor i IADK-së ka theksuar se mbështetja gjermane ka qenë dhe është kryesorja për fermerët por edhe vet zhvillimin e IADK-së, e cila donacionet kryesore i ka nga Gjermania. “Gjermania përmes GIZ-it dhe organizatave tjera ka raporte të mira partneriteti me IADK-në, ky gjysma e fermerëve të Kosovës që janë mbështetur nga IADK janë të mbështetura nga Gjermania. Por kjo mbështetje në të ardhmen do të jetë edhe më e madhe”, ka deklaruar Bunjaku.
Në vizitën e tij tek fermerët vushtrrias por edhe në IADK, ambasadori gjerman u shoqërua nga drejtuesit e GIZ-it në Kosovë por edhe nga zëvendësministri i bujqësisë Mevludin Krasniqi. /Veriu.info/
