Ambasadori britanik në Kosovë, Jonathan Hargreaves, ka zhvilluar vizitë në Drenas ku e ka takuar kryetarin Ramiz Lladrovci, duke e potencuar që komuna nën udhëheqjen e tij për shumë vjet është shpallur me performancën më të mirë.
Në një postim në profilin e tij në Facebook, ambasadori ka shkruar:
“I lumtur që vizitova Komunën e Drenasit sot. Ishte kënaqësi të dëgjoja nga Kryetari Ramiz Lladrovci se Drenasi, për shumë vite, është shpallur si një nga komunat me performancën më të mirë, duke përfituar nga grantet e performancës. Dhe ishte e rëndësishme të dëgjoja se disa nga prioritetet kryesore të Kryetarit që ishin mjedisi: përmirësimi i menaxhimit të mbeturinave, adresimi i skrapit të makinave të vjetra dhe sigurimi i furnizimit të besueshëm me ujë”.
Tutje, Hargreaves shton: “Gjithashtu isha i lumtur të takoja Kadire Tahirajn, Drejtoreshën e Qendrës për Promovimin e të Drejtave të Grave. Urime për ndërtesën e re të ofruar nga komuna dhe për gamën e gjerë të shërbimeve dhe mundësive që u ofrojnë grave në zonë – nga zgjerimi i aftësive deri te shndërrimi i tyre në punë fitimprurëse, siç është qepja dhe prodhimi i çantave të dorës. Frymëzuese të shohësh një përkushtim të tillë për fuqizimin e grave dhe forcimin e komunitetit”.
