Aktorja e njohur Amanda Peet ka ndarë së fundmi një rrëfim të ndjerë për një nga periudhat më të vështira të jetës së saj, duke zbuluar se është diagnostikuar me kancer të gjirit në vjeshtën e kaluar.
Ajo tregoi se prej vitesh ishte nën kontroll të vazhdueshëm mjekësor për shkak të një rreziku të shtuar, por diagnoza erdhi pas një kontrolli që pritej të ishte rutinë. Një dyshim i vogël i vënë re gjatë një ekzaminimi me ultrazë çoi në kryerjen e menjëhershme të një biopsie, e cila konfirmoi shumë shpejt praninë e tumorit.
Fatmirësisht, tumori u zbulua në një fazë të hershme dhe rezultoi në stadin e parë, çka rrit ndjeshëm mundësitë për trajtim të suksesshëm. Mjekët hartuan një plan që përfshin ndërhyrje kirurgjikale dhe terapi me rrezatim, ndërsa ekzaminimet shtesë treguan edhe praninë e një mase beninje.
Megjithatë, sfida shëndetësore nuk ishte e vetmja për aktoren. Në të njëjtën periudhë, ajo po përjetonte edhe dhimbje të mëdha në familje, pasi humbi të dy prindërit brenda pak muajsh. Këto ngjarje e bënë përballjen me sëmundjen edhe më të vështirë në aspektin emocional.
Në rrëfimin e saj, Peet foli hapur për përjetimet e brendshme, duke përmendur luhatjet mes frikës dhe shpresës. Ajo theksoi se ka pasur momente kur është ndjerë më e fortë se kurrë, por edhe çaste pasigurie për të ardhmen.
