Komuna e Skenderajt ka reaguar nëpërmjet një komunikate për Aktgjykimin e Gjykatës së Apelit për Sami Lushtakun që e lë kryetarin e saj në burgim me 7 vjet heqje lirie.
Për komunën ky është një gjykim skandaloz dhe tendencioz për të justifikuar gabimet e sistemi të drejtësisë duke e shpalluar të pafajshëm z. Lushtaku për akuzat për vrasje, e në anën tjetër duke e dënuar atë me akuza absurde dhe të paqena.
Komunikata e plotë e Komunës së Skenderajt:
Komuna e Skenderajt e vlerëson aktgjykimin e Gjykatës së Apelit si sakandaloz dhe tendencë për të justifikuar gabimet e sistemi të drejtësisë duke e shpalluar të pafajshëm z. Lushtaku për akuzat për vrasje, e në anën tjetër duke e dënuar atë me akuza absurde dhe të paqena.
Dënimi pa fakte për vrasje në shkallën e parë dhe dënimi i sotëm që ndërlidhet me përgjegjsinë komanduese të z. Lushtaku janë totalisht të pabazuara dhe të pafaktuara.
Si dënimi në shkallën e parë ashtu edhe ky i sotmi janë të orkestruara politikisht më qëllim të cënimit të integritetit personal e publik të z. Lushtaku. Çdo ditë, edhe pse shumë ngadalë, po shpërfaqen qëllimet e ndjekjes ndaj z. Lushtaku, që kanë të bëjnë me dëmtimin e autoritetit dhe popullaritetit të tij si komandant i UÇK-së dhe si Kryetar komune.
Ne e dimë se z. Sami Lushtaku nuk ka bërë asnjë nga krimet e sypozuara nga të dy shkallët e gjykatave, mirëpo a do t’i duhet drejtësisë në Kosovë që ta vertetojë pafajësinë e z. Lushtaku edhe për disa vite të tjera, kjo është pyetja që më të drejtë e bënë sot çdo qytetar i Skenderajt.
Sami Lushtaku dhe veprimatria e tij patriotike dhe politike në shërbim të çlirimit dhe ndërtimit të Kosovës, është dhe do të mbetet e pastër si loti. koha e ka dëshmuar, po e dëshmon dhe do ta dëshmojë këtë.
