Prokuroria Themelore në Pejë, Departamenti i Krimeve të Rënda, ka ngritur aktakuzë ndaj katër personave me inicialet L.B., L.M., F.M. dhe Sh.Gj., nën dyshimin për kryerjen e veprës penale “Grabitja”. Ndërkohë, ndaj të pandehurit L.M. është ngritur edhe aktakuzë për “Mbajtje në pronësi, kontroll ose posedim të paautorizuar të armëve”, sipas Kodit Penal të Republikës së Kosovës.
Sipas aktakuzës, ngjarja ka ndodhur më 21 maj 2025, rreth orës 23:35, kur katër të pandehurit – duke vepruar si grup i organizuar – kanë grabitur pompën e derivateve “DHF” në qytetin e Pejës.
Prokuroria thotë se të pandehurit fillimisht kanë siguruar një armë të gjatë dhe më pas, me veturën e njërit prej tyre, janë nisur drejt vendit të ngjarjes. Pas arritjes, kanë vendosur maskat në kokë dhe kanë hyrë me armë brenda marketit të pompës, ku nën kërcënimin e forcës dhe armës i kanë marrë punëtorit të pompës shumën prej 905 euro. Menjëherë pas grabitjes, të pandehurit janë larguar me veturë dhe më pas kanë ndarë paratë mes tyre.
Në aktakuzë, prokurori i rastit ka kërkuar që të katër të pandehurit të dënohen në përputhje me ligjin, ndërsa ka propozuar edhe konfiskimin e veturës tip Golf II të përdorur në rast, konfiskimin e shumës prej 575 euro të gjetur tek të pandehurit, konfiskimin e armës si dhe lëshimin e urdhrit për kompensimin e dëmit të shkaktuar ndaj kompanisë së dëmtuar.
Organet e rendit kanë konfirmuar se hetimet për këtë rast janë kryer në bashkëpunim me Policinë e Kosovës dhe se të gjitha provat e nevojshme janë siguruar për procedim të mëtejmë gjyqësor.
Procesi ndaj të pandehurve pritet të zhvillohet brenda afateve ligjore në Gjykatën Themelore të Pejës.
