Në plotësim-ndryshimin e ligjit për RTK-në, kryetarja e komisionit parlamentar për Administratë Publike dhe Media, Xhevahire Izmaku, ka propozuar që drejtori i përgjithshëm i RTK-së emërohet me shumicën e thjeshtë dhe shkarkohet me 2/3 e votave të anëtarëve të pranishëm të Bordit të RTK-së, raporton KTV.
Mandati i tij do të jetë 3 vjet dhe me mundësi të rizgjedhjes nga Bordi i RTK-së. Riformulimi i këtij paragrafi nuk e kufizon rizgjedhjen e përhershme të drejtorit të RTK-së.
Deputetja Xhevahire Izmaku nuk e pranon se është propozuesja e këtij ndryshimi, por në draftligj shihet se ajo është propozuesja.
Përgjigje rreth ndryshimit të ligjit për RTK-në nuk ka dhënë as drejtori aktual i RTK-së.
Jeton Mehmeti nga Institutin GAP e sheh si të rrezikshme për funksionimin e transmetuesit publik moskufizimin e mandatit të drejtorit të RTK-së.
Kryetari i Asociacionit të Gazetarëve të Kosovës, Shkëlqim Hysenaj, kërkon më shumë transparencë dhe përfshirjen e AGK-së në hartimin e ligjit për RTK-në.
Moskufizimin e mandatit të drejtorit të RTK-së, Sindikata e Pavarur e RTK-së e cilëson si mundësi të vazhdueshme për ndikime të grupeve të caktuara në këtë medium.
