Udhëheqësi i Koresë së Veriut Kim Jong Un duket se po ndërmerr hapa për të konsoliduar pozicionin e vajzës së tij si pasardhëse dhe ka shenja se ajo po jep kontribut në çështjet e politikave, thanë ligjvënësit e Koresë së Jugut të enjten, duke cituar një informim të agjencisë së spiunazhit, shkruan Reuters, trasnmeton Express.
Agjencia Kombëtare e Inteligjencës e Koresë së Jugut (NIS) do të vëzhgojë nga afër nëse vajza, që besohet se quhet Kim Ju Ae, do të marrë pjesë në një takim të ardhshëm të Partisë së Punëtorëve në pushtet dhe si do të paraqitet ajo, përfshirë nëse merr ndonjë titull zyrtar.
“Në të kaluarën, NIS e përshkroi Kim Ju Ae si ‘në studim si pasardhëse’, por sot shprehja e përdorur ishte se ajo ‘ishte në fazën e emërimit të brendshëm si pasardhëse’,” ka deklaruar ligjvënësi Lee Seong-kweun para gazetarëve pas një takimi me dyer të mbyllura nga NIS.
Ju Ae, e cila besohet të jetë në adoleshencën e hershme, është paraqitur gjithnjë e më shumë në mediat shtetërore të Koresë së Veriut duke shoqëruar të atin në udhëzime në terren, duke përfshirë inspektimet e projekteve të armëve, mes spekulimeve nga analistët se ajo po përgatitet si udhëheqësja e gjeneratës së katërt të vendit.
NIS beson se roli që ajo ka marrë gjatë ngjarjeve publike tregon se ajo ka filluar të ofrojë kontribut politik dhe se po trajtohet si udhëheqësja de facto e dytë më e lartë, thanë Lee dhe një ligjvënëse tjetër, Park Sun-won.
