Mediat serbe raportojnë se një aeroplan luftarak MIG 29 i ushtrisë serbe, ka fluturuar sot mbi Novi Pazar duke lëvizur në drejtim të zonës së sigurisë. Ai ishte ngritur në ajër nga Kraleva.
Siç raporton Tanjug, presidenti serb Aleksandar Vuçiq, sot në orët e hershme të mëngjesit pas aksionit të Policisë së Kosovës në veri dhe arrestimit të 19 serbëve, si komandant suprem ka urdhëruar që njësi të caktuara të organeve të sigurisë serbe të jenë në gjendje gatishmërie, transmeton Telegrafi.
“Nëse vjen deri te çfarëdo eskalimi të situatës ku rrezikohet jeta e qytetarëve serbë në Kosovë, ushtria jonë do ta mbrojë popullin tonë”, ka deklaruar presidenti serb.
Sipas Tanjug nga kazerma e ushtrisë serbe në Kralevë, rreth orës 14:00 kanë filluar të dalin mjete ushtarake të mbushura me njerëz dhe pajisje të ndryshme. Kjo kolonë sipas mediave serbe ishte nisur në drejtim të Rashkës. /Telegrafi/
