Kandidati i Lëvizjes Vetëvendosje, Artan Abrashi ka marrë edhe një përkrahje për garën e balotazhit që do të zhvillohet me 9 nëntor.
Ai ka arritur një marrëveshje me ish-deputetin Erxhan Galushi nga Lëvizja Përparimtare e Romëve të Kosovës (LPRK).
Sipas Abrashit, Galushi dhe Lëvizja Përparimtare e Romëve të Kosovës do të kontribuojnë me përvojën dhe përkushtimin e tyre në ndërtimin e një administrate komunale të ndershme, transparente dhe efikase, në shërbim të të gjithë qytetarëve pa dallim.
Postimi i plotë:
Marrëveshje Bashkëpunimi
Sot arritëm një marrëveshje bashkëpunimi ndërmjet meje dhe z. Erxhan Galushi, ish-deputet i Kuvendit të Republikës së Kosovës dhe kryetar i Lëvizjes Përparimtare të Romëve të Kosovës (LPRK).
Ky bashkëpunim ka për qëllim forcimin e vizionit tonë të përbashkët për një Prizren të zhvilluar, të drejtë dhe gjithëpërfshirës, ku çdo komunitet, përfshirë edhe komunitetin rom, të ketë zë dhe vend të merituar në zhvillimin e qytetit tonë.
Z. Galushi dhe Lëvizja Përparimtare e Romëve të Kosovës do të kontribuojnë me përvojën dhe përkushtimin e tyre në ndërtimin e një administrate komunale të ndershme, transparente dhe efikase, në shërbim të të gjithë qytetarëve pa dallim.
Ky është një hap tjetër i rëndësishëm drejt bashkimit të forcave pozitive për ta bërë Prizrenin shembull të bashkëjetesës, respektit dhe zhvillimit të barabartë për të gjithë.
