Kryetari i Lidhjes Demokratike të Kosovës, Lumir Abdixhiku, ka hapur zyrtarisht fushatën e partisë së tij për zgjedhjet lokale që do të mbahen më 12 tetor.
Në një tubim me strukturat dhe simpatizantët e LDK-së, ai theksoi se partia që ai drejton nuk ndërton mbi rrënime, por mbi vlera dhe përfshirje, transmeton lajmi.net.
“Ne krijojmë. Jo duke rrënuar shtetin, por duke e bërë atë. Jo duke e përulur tjetrin, por duke e afruar atë. Jo duke e zaptuar komunën, por duke e dashur atë,” u shpreh Abdixhiku, duke e pozicionuar LDK-në si alternativë të qeverisjes lokale me vizion e përgjegjësi.
Ai theksoi se qytetarët e Kosovës gjithmonë i kthehen LDK-së pas çdo krize politike, sepse sipas tij, kjo është partia ku gjejnë “strehën e sigurt, strehën e arsyes dhe strehën e shtetit”.
Në fjalimin e tij, Abdixhiku u zotua për një lidership që mbron Kushtetutën dhe forcon marrëdhëniet me aleatët ndërkombëtarë.
“Tek ne gjejnë njerëzit që bëjnë shtetin, jo që e shkatërrojnë atë. Tek ne gjejnë njerëzit që e duan Kushtetutën, jo që e shkelin atë… sepse një Kosovë kemi, këtë shtet kemi, këtë vend kemi,” përfundoi ai./lajmi.net/
