Pas aktakuzave të konfirmuara për Kadri Veselin dhe Hashim Thaçin dhe dorëheqjes së këtij të fundit, AAK-ja po kërkon mbledhje të jashtëzakonshme të qeverisë, si dhe mbledhje urgjente të Këshillit të Sigurisë.
Kryetari i kësaj partie Ramush Haradinaj ka thënë se AAK-ja kërkon gjithashtu edhe seancë të jashtëzakonshme të Kuvendit të Kosovës në përkrahje të vlerave të UÇK-së dhe luftëtarëve të lirisë.
Ai po ashtu thotë se partia e tij kërkon takim të të gjithë spektrit politik për gjetjen e unitetit kombëtar në ballafaqimin me sfidat politike dhe kushtetuese.
Postimi i plotë i Ramush Haradinaj në Facebook:
Deklaratë nga mbledhja urgjente e Kryesisë së AAK
– Aleanca për Ardhmërinë e Kosovës po përcjellë me shqetësim zhvillimet pas aktakuzave të Dhomave të Specializuara për ish-luftëtarët e Ushtrisë Çlirimtare të Kosovës.
– AAK beson në drejtësi, në luftën e drejtë çlirimtare të Kosovës dhe në pafajësinë e luftëtarëve të UÇK-së! Lufta e UÇK-së ishte luftë çlirimtare dhe mbrojtëse, kundër pushtetit kriminal e gjenocidal serb, dhe do të dëshmohet si shumë herë më parë, pastërtia e saj.
– AAK kërkon:
1. Mbledhje të jashtëzakonshme të qeverisë për gjendjen e krijuar pas ngritjes së aktakuzave nga Dhomat e Specializuara. Qeveria duhet të ndërprejë menjëherë të gjitha aktiviteteve që lidhen me procesin e dialogut me Serbinë, deri në një situatë të re
2. Mbledhje urgjente të Këshillit të Sigurisë së Kosovës për situatën e sigurisë së përgjithshme
3. Seancë të jashtëzakonshme të Kuvendit të Kosovës, në përkrahje të vlerave të UÇK-së dhe luftëtarëve të lirisë
4. Takim të të gjithë spektrit politik për gjetjen e unitetit kombëtar në ballafaqimin me sfidat politike dhe kushtetuese
– AAK pyet aleatët tonë strategjik ndërkombëtarë, se a jemi në rrugën e duhur për antarësim në NATO, apo këto ngjarje do e kthejnë Kosovën prapa?
