Kryetari i Naftëtarëve të Kosovës, Fadil Bernjani, ka bërë të ditur për Lajmi.net se çmimet e derivateve në Kosovë sot sillen përafërsisht në nivelet e mëposhtme:
Dizeli: 1.23 € – 1.35 €
Benzina: 1.24 € – 1.34 €
Ai ka theksuar se çmimet kanë qenë të qëndrueshme për tre muaj dhe nuk ka pasur lëvizje në bursë gjatë kësaj periudhe.
Bernjani ka sqaruar se tensionet aktuale dhe nisja e sulmeve në Iran po ndikojnë në rrezikun e ndërprerjes së prodhimit dhe në ngushticën e Hormuzit, një nga rrugët më të rëndësishme të kalimit të naftës në botë.
Ai ka shtuar se për momentin, nga qindra anije që kalonin në këtë koridor në ditë, tani kalojnë vetëm 4-5, duke e bërë transportin shumë më të rrezikshëm.
Megjithatë, kryetari i Naftëtarëve të Kosovës ka qetësuar qytetarët duke theksuar se nuk ka nevojë për panik, pasi ka sasi të mjaftueshme të derivateve në Kosovë dhe tregu po ofron çmime më të ulëta krahasuar me rajonin. Ai shprehu shpresën se një marrëveshje paqeje mund të stabilizojë tregun global të naftës.
Bernjani gjithashtu ka theksuar se qytetarët e Kosovës po përfitojnë aktualisht nga çmimet më të ulëta të karburanteve krahasuar me vendet përreth./Lajmi.net/
