Pavarësisht deklarimeve të tij “të qarta si rrezja e diellit”, mjegulla politike rreth situatës në Drenas nuk po shpërndahet. Sipas autorit të reagimit, disa eksponentë të Partisë Demokratike të Kosovës po e paraqesin gjendjen si normale, ndërsa disfata po shitet si fitore.
Ai thekson se mësimi nga Drenasi nuk ka dhënë efektin e duhur dhe se reflektimet e deritanishme, qoftë përmes “ligjëratave koti” të ndonjë zyrtari të lodhur, qoftë përmes deklaratave të z. Hamza që “synon të barazojë shkakun dhe pasojën”, nuk e ndihmojnë partinë. Sipas tij, këto qasje nuk e fuqizojnë as PDK-në dhe as degët e saj.
“Uniteti është zotim përkushtimi për qëllime më të larta sesa fati i një dege apo individi. Uniteti është kusht i fitores për ta ndryshuar gjendjen e Kosovës, e cila qëndron mbi çdo sakrificë tonën”, thuhet në reagim.
Ai vlerëson se situata aktuale brenda PDK-së kërkon ridefinim të qasjes politike dhe metodave organizative, duke përdorur “gjuhën e fitimtarëve, me vizion, pa kushte dhe pa hile”.
Sipas autorit, partia duhet të largohet nga “shkurtpamësia politike” dhe të ruajë vlerat e saj të ndërtuara nga breza me përkushtim atdhetar, mbi themelet e heronjve të luftës dhe paqes, për një Kosovë me orientim të qartë euro-atlantik.
Në të kundërtën, paralajmërohet se “keqbërësit dhe bedelët politikë” do të mbeten shenjë dalluese e një partie që ka pasur rol kyç në shtetformimin dhe shtetndërtimin e vendit.
