Informacione të shërbimeve amerikane të inteligjencës sugjerojnë se Kina mund të jetë duke përgatitur dërgimin e sistemeve të reja kundërajrore drejt Iranit në javët e ardhshme, sipas tre burimeve të njohura me vlerësimet e fundit. Një zhvillim i tillë konsiderohet veçanërisht provokues, pasi vjen menjëherë pas armëpushimit të brishtë që ndaloi përkohësisht përplasjet mes Iranit dhe Shteteve të Bashkuara.
Sipas të njëjtave burime, Teherani mund të jetë duke shfrytëzuar këtë periudhë armëpushimi për të rifreskuar dhe forcuar arsenalin e tij ushtarak me ndihmën e partnerëve të huaj, çka mund të ndikojë ndjeshëm në balancën e forcave në rast të rifillimit të konfliktit.
Dy prej burimeve nga CIA Amerikane, të cilat kanë folur për CNN, theksojnë se ekzistojnë indikacione që Pekini po përpiqet të dërgojë këto sisteme përmes vendeve të treta, me qëllim fshehjen e origjinës së tyre. Bëhet fjalë për sisteme portative kundërajrore (MANPADS), të cilat përbëjnë një kërcënim serioz për avionët ushtarakë që fluturojnë në lartësi të ulëta — siç është vërejtur edhe gjatë përplasjes së fundit.
Vlerësimet amerikane i lidhin këto sisteme me rrëzimin e një avioni luftarak F-15 mbi territorin iranian javën e kaluar. Presidenti amerikan Donald Trump kishte deklaruar se avioni u godit nga një “raketë portative me drejtim termik”, ndërsa autoritetet iraniane folën për përdorimin e një sistemi të ri kundërajror, pa dhënë detaje të mëtejshme. Megjithatë, mbetet e paqartë nëse sistemi në fjalë ishte i prodhimit kinez.
Nga ana tjetër, ambasada kineze në Uashington ka mohuar kategorikisht këto pretendime, duke theksuar se “Kina nuk ka furnizuar kurrë me armë asnjërën palë të konfliktit” dhe duke i cilësuar raportimet si të pabazuara. Pekini ka deklaruar gjithashtu se është i angazhuar për uljen e tensioneve dhe promovimin e paqes.
Nëse konfirmohet, një dërgesë e tillë do të përbënte një përshkallëzim të ndjeshëm të mbështetjes kineze ndaj Iranit, përtej angazhimit aktual që ka qenë kryesisht në fushën e teknologjive me përdorim të dyfishtë. Sipas burimeve, këto teknologji kanë ndihmuar tashmë Teheranin në zhvillimin e sistemeve të avancuara ushtarake dhe në përmirësimin e kapaciteteve të tij operacionale.
Presidenti Amerikan Donald Trump e ka bere te qarte se kushdo qe ndihmon ne riarmatosjen e Iranit do te perballet me 50% tarifa tregtare.
