Në pikat kufitare kroate me Serbinë dhe Bosnjën e Hercegovinën, që nga mëngjesi janë formuar turma të mëdha dhe radhë të gjata.
Arsyeja për këtë është fillimi i zbatimit të plotë të Sistemit të ri Evropian të Hyrjeve/Daljeve (EES), i cili përkoi me një fundjavë të zgjatur dhe rritje të trafikut të pasagjerëve. Për shkak të kontrolleve të reja dhe më të detajuara në të gjitha hyrjet dhe daljet nga zona Shengen, njerëzit presin me orë të tëra për të hyrë në Kroaci.
Sidomos kritike është në pikën kufitare Batrovci-Bajakovo me Serbinë, ku vlerësohet se pritja për të hyrë në Kroaci mund të jetë deri në tre orë. Kjo situatë është rezultat i kombinimit të fundjavës së festave dhe fillimit të zbatimit të sistemit të ri të kontrollit kufitar.
Pasagjerët që hyjnë në Bashkimin Evropian do të duhet të japin gjurmët e gishtërinjve dhe të bëjnë një foto pas mbërritjes në zonën Shengen.
Është një sistem i automatizuar informacioni që regjistron të dhëna personale, të dhëna të dokumenteve të udhëtimit, të dhëna biometrike, si dhe datën dhe vendin e hyrjes dhe daljes. Sistemi gjithashtu regjistron refuzimet e hyrjes dhe përdoret në 29 vende evropiane për të rritur sigurinë dhe për të monitoruar më mirë tejkalimet e lejeve të qëndrimit./Indeksonline/
