Gjykimi në Hagë, me pretendimet për krime lufte nga udhëheqësit e Ushtrisë Çlirimtare të Kosovës, po shkon drejt përmbylljes, pas tri vitesh proces gjyqësor e pesë vitesh paraburgim.
Gjykimi që nisi në vitin 2023, nga 3 deri më 5 prill u fokusua në dëgjimin e akuzave të ngarkuara, për të cilat Hashim Thaçi, Kadri Veseli, Jakup Krasniqi dhe Rexhep Selimi u deklaruan të pafajshëm.
Pas një procesi të gjatë me dëshmitarë të mbrojtur të Prokurorisë e provave të cilat i prezantoi e përdori Prokuroria e Hagës, një numër prej të cilave ishin të ardhura nga Serbia, ka pasur reagime të mëdha në Kosovë, madje edhe protesta.
Paraburgim i gjatë e asnjë leje për lirim nga paraburgimi, madje as leje për pjesëmarrje në varrim, shkruan RTK.
As Avokati i Popullit në këtë gjykatë nuk e kishte aprovuar as edhe një ankesë të të akuzuarve në Hagë.
Dëshmitarët e mbrojtjes vërtetuan të kundërtën e akuzës gjatë dëshmisë së tyre për ditë radhazi në sallën e gjyqit.
Kërkesa e prokurorisë për 180 vjet burgim për katërshen ngjalli reagime po ashtu. Ish-hetuesja Nevenka Tromp kishte deklaruar se në raste kur provat janë të pamjaftueshme, prokuroria shpesh tenton ta kompensojë këtë mungesë me kërkesa jashtëzakonisht të ashpra për dënime.
Por në periudhën kur procesi është përmbyllur dhe tanimë është në dorën e gjykatësve, Prokuroria ka vazhduar ende me dorëzimin e materialeve dhe të provave.
Kryetari i Trupit gjykues, Charles Smith, në ditën e fundit të gjyqit ndaj krerëve të UÇK-së kishte theksuar se palët nuk kanë të drejtë të dërgojnë më prova apo parashtresa pas mbylljes së çështjes, përveç në rastet kur shqyrtohet paraburgimi.
Derisa procesi është drejt përfundimit dhe pritet vendimi i shkallës së parë, ende nuk dihet nëse do të shpallet brenda 90 ditëve të para apo gjykata do të kërkojë kohë shtesë.
