Familja e aktorit legjendar, Chuck Norris, ka reaguar publikisht ndaj përhapjes së informacionit të rremë dhe videove të manipuluara me inteligjencë artificiale që kanë qarkulluar në rrjet, duke pretenduar rreth rrethanave të vdekjes së tij.
Në një reagim të fortë, të afërmit e aktorit kanë dënuar përmbajtjet e pavërteta që janë shpërndarë në rrjetet sociale dhe platforma të ndryshme, duke theksuar se këto materiale jo vetëm që dezinformojnë publikun, por edhe cenojnë privatësinë dhe dinjitetin e familjes në një moment të vështirë.
Sipas tyre, një pjesë e videove të krijuara me teknologji AI kanë shtrembëruar realitetin dhe kanë nxitur konfuzion të madh te fansat, duke përhapur versione të pabazuara për shëndetin dhe ndarjen nga jeta të aktorit.
Reagimi vjen në një kohë kur lajmi për ndarjen nga jeta të ikonës së filmave aksion ka pushtuar mediat ndërkombëtare, ndërsa familja kërkon respekt dhe përgjegjësi në trajtimin e informacionit publik.
“Jemi të vetëdijshëm se që nga vdekja e Chuck Norris, në internet kanë qarkulluar video dhe postime të shumta që janë krijuar duke përdorur inteligjencën artificiale dhe përmbajnë informacione të rreme dhe mashtruese në lidhje me rrethanat e vdekjes së tij, historinë e tij mjekësore dhe se kush ishte i pranishëm. Këto pretendime janë plotësisht të pavërteta.
Kjo përfshin raporte të sajuara për probleme mjekësore të kaluara, si dhe rrëfime të rreme rreth marrëdhënieve familjare. Ju kërkojmë të mos besoni ose ndani asnjë informacion përveç nëse vjen direkt nga familja Norris ose një zëdhënës zyrtar. Faleminderit për mirëkuptimin tuaj dhe që vazhdoni ta mbani familjen tonë në mendimet dhe lutjet tuaja. Familja Norris .”
Kujtojmë se Chuck Norris ndërroi jetë në moshën 86-vjeçare, ndërsa lajmi u konfirmua nga familja e tij përmes një deklarate publike.
