Mesditën e së hënës ka ndërruar jetë 31-vjeçarja Ardita Gashi nga fshati Majac i Podujevës, si pasojë e plagëve të rënda që kishte marrë mbrëmjen e 22 marsit.
Vdekjen e saj për IndeksOnline e ka konfirmuar zëdhënësja për informim në QKUK, Mirlinda Qyqalla.
“Sipas njoftimit nga Qendra Emergjente në Qendrën Klinike Universitare të Kosovës (QKUK), 31 vjeçarja, Ardita Gashi ka ndërruar jetë pak më parë. Përkundër përpjekjes së stafit mjekësor për t’i ofruar trajtimin dhe ndihmën e duhur, nuk ka arritur t’iu mbijetojë plagëve të rënda”, ka thënë Qyqalla.
Rrethanat e plota të ngjarjes mbeten ende nën hetim nga autoritetet kompetente.
Sipas Prokurorisë Themelore në Prishtinë, burri i vrarë Ilaz Brahimi është gjetur pa shenja jete në veturë, kurse Miradije Gashi ka vdekur në QKUK pas plagëve të marra. E dyshuar për këtë rast, ishte Ardita Gashi, e cila pastaj qëlloi edhe veten e saj.
Motivet e këtij rasti ende nuk dihen, transmeton IndeksOnline.
“Aktualisht, sipas hetimeve preliminare, motivi i këtij rasti ende nuk është i njohur. Prokurori i Shtetit, në bashkëpunim me institucionet përkatëse, është duke zhvilluar hetimet intensive për ndriçimin e plotë të këtij rasti tragjik”, thuhet nga Prokuroria./IndeksOnline/
