Real Madridi ka marrë një fitore të madhe, në garën për titullin e kampionit në La Liga.
Të besuarit e Alvaro Arbeloas kanë marrë një fitore të lehtë ndaj Elches, me ndeshjen e luajtur në “Bernabeu”, në kuadër të xhiros së 28-të në La Liga.
Reali fitoi 4-1, me katër golashënues të ndryshëm nga Reali.
Serinë e golave e hapi Antonio Rudiger, në minutën e 39-të, pas një dominimi të lehtë nga Reali kah rastet e krijuara.
Rudiger shënoi pasi një goditje e Federico Valverdes u rikthye nga duart e portierit, në kokën e lojtarit të Elches, e më pas u godit nga Rudigeri me një gjysmëvolej, për 1-0.
Pesë minuta më vonë, Reali e dyfishoi epërsinë, me Valverden që shënoi një supergol, për 2-0.
Ky ishte goli i tij i pestë në tri ndeshjet e fundit, pasi më parë kishte shënuar ndaj Celta Vigos në fundjavën e kaluar, dhe ndaj Manchester Cityt në mesjavë.
Me këto shifra u mbyll pjesa e parë, teksa Reali shënoi edhe një gol tjetër në pjesën e dytë.
Ishte mbrojtësi spanjoll, Dean Huijsen që shënoi për 3-0 me kokë, në minutën e 66-të.
Në minutën e 85-të megjithatë, Elche e shënoi golin e nderit, kur Manuel Angel i Realit e dërgoi topin në rrjetën e tij për autogol.
Por, goli i mbrëmjes u shënua nga Arda Guleri, i cili shënoi nga pothuajse 70 metra, pasi e pa daljen e portierit kundërshtar larg portës së tij.
Me këtë fitore, Reali renditet i dyti me 66 pikë, një më pak se Barcelona në vendin e parë, e cila e ka edhe një ndeshje më pak, të cilën do ta zhvillojë nesër.
Ndërkohë, Elche është e 17-a me 26 pikë, një më shumë se Mallorca që është e 18-ta me një ndeshje më pak./GazetaExpress/
